其實唔係唔知，一般教會女仔對弟兄嘅批評係乜，係覺得我地悶，唔識氹人，唔識照顧女仔感受，唔似出面啲男仔咁好玩，咁識氹人，咁多花臣。
有時候作為一件資深單身弟兄係好難做，自細返教會我地被訓練成一班乖乖仔，目不斜視，正襟危坐，唔好同異性有任何身體接觸，崇拜有女仔著背心短褲千祈唔好望，你一望呀，比隻匙羹你挖一隻眼出黎，一隻眼落地獄都唔好全身落，對女仔唔好口花花，唔好講野無黎正經，淫詞妄語一句不能出口，要講造就人嘅說話，要尊重女仔，唔好睇咸片，唔好打丁丁，出黎食飯要拉櫈斟茶遞水，最好主動埋單，唔好AA制。
突然間到咁上下年紀，又比人嫌我地太悶太正經，唔識講野氹人，唔夠浪漫又無情趣，唔理解異性心理，唔識解讀啲暗示，激嬲人又唔知，同我地講乜野「女仔都係要氹嘅~~~~」。大佬，我係教會黎黎去去學果招叫「先求祂的國和祂的義」、「賢惠的妻子是耶和華所賜的」，無人話過比我聽仲要學識降龍十八掌、伏虎羅漢拳、金鐘罩、冰火五重天同六脈神劍。教會「在世間尋覓愛侶」個syllabus無教喎，而家突然話要考，仲問我做乜唔識。簡直係叫一個足球員剎時間去改打籃球，仲要佢射三分下下穿針。好似我地背脊有個制，一拍著左就可以口甜舌滑識氹女仔，一熄左就變返正經八百，出口成文，可以坐底查經。
因為過往呢啲教導，令教會弟兄普遍係好缺乏實戰經驗與異性相處，並且以談戀愛為目標，要去到想再進一步時應該點做，到真係鍾意咗一個人，除左私底下祈禱，閱讀相關屬靈書籍，咨詢屬靈長者，尋求上帝印證同搞集體活動之外，點樣表示自己嘅好感呢。大家當年係道聽途說，係坊間電視電台雜誌學埋啲屎橋，例外冬天除件褸比女仔，去茶樓要幫女仔拉櫈(呢個係我牧師當年非常強調嘅追女秘技，要展示風度)。我問返啲姊妹，十個有十個話太造作，如果唔係女仔真係凍主動問你，可免則免；咩年代仲要幫人拉櫈？唔會有人覺得你有風度，只會覺得你多餘扮晒野。
或者請教身邊經驗豐富嘅兄弟，但佢分分鐘教你，約人出黎見面後，第一下就拖落去，甚至係錫埋去而呢D招數，你永遠唔夠膽做。我果個年代睇《Yes》，而家可能係高登/連登/Discuss/beautyexchange，或者唔知睇埋邊套TVB電視劇，話你唔表白就一定無機會，表白左機會幾微都叫有機會，同射十二碼一樣，一係入，一係唔入。
所以姊妹係教會入面，係會遇到好多神神化化騎騎尼尼嘅「追求者」，佢地總係唔聲唔聲咁add你FB，唔知係咩渠道拎左你電話。當年團契好鍾意整果D通訊錄，有晒所有人電話，全無私隱觀念可言。失驚無神飛個whatapps過黎，有意無意咁出現係你身邊，跟你返埋同一堂崇拜，坐正係你後面，好似成個跟蹤者(stalker)咁。甚至係你唔係好熟佢，一年加理傾唔夠十句時，佢已經認定咗你做佢生命中嘅惟一，選擇表白，話比你聽佢已經祈禱咗三年，同埋睇咗五十本屬靈書，搵過十幾個長者咨詢，好清楚妳係上帝預備比佢果個，希望妳回應上帝，同佢一齊拍拖結婚白頭到老生養眾多。
所以除左果啲一早唔聽教會講嘅男仔，走出去四圍去識女仔，以致佢地可以累積到實戰經驗之外，其他聽話跟教會講咩寧缺莫濫唔好亂黎每段失敗嘅戀情係負擔果啲，自然留係屋企食蕉。即係教會教到班男仔一碌木，成個屬靈毒男咁，得閑睇聖經靈修讀經祈禱，有時間比晒教會事奉，又怪責佢地點解似一碌木，淨係識「先求祂的國和祂的義」，唔受女性歡迎。
作為一個資深單身弟兄，即使學唔黎都好，一樣會觀察到邊款男仔係教會入面較受女生歡迎。
基本上不外乎兩種，第一種當然係筍盤，富二代高大靚仔有型事業有成有樓s係手，係咪愛主靈命好事奉多，姊妹們遇上筍盤似乎唔會好計較。不過呢款比唔上另一款咁受觀迎，另一款就係傳統所講嘅「男人不壞，女人不愛」，口花花無嚟正經四圍撩女，返教會唔係好穩定，但又扮出個樣，願意為妳改變。以我所見，後者係教會入面，堅係溝死女，無數人衝埋去比佢玩。
而最唔受姊妹歡迎，偏偏係教會最推崇果種，注重內在美，「無佳形美容」，敬虔專一，份人謙虛與世無爭，不追求世上榮華，所以世上榮華亦無佢份，一心諗住傳福音造福人群。
其實，如果個女仔一識個男仔就發覺佢好識懂氹人開心，好識照顧你，與異性相處時如魚得水，其實背後不外幾個原因。一係佢原生家庭成屋女人，自細係女人堆大，對上有兩個家姐，對下有一個細妹，老豆係行船成日唔係屋企。其次不外乎係佢閱女無數，係熟手技工，好懂得女性心理，可以好快掌握同你之間嘅關係，氹你歡喜，咁呢類情場殺手鬼見愁、墳場姑爺仔又係唔係教會姊妹想要付托終身果種呢，恐怕又未必。第三，快啲打三條九啦，妳遇到網上情緣騙案。
